(Update) CAGAYAN DE ORO CITY – Gipamugos sa kampo ni detained Balingoan municipal councilor ug vice mayoralty candidate Richard Gepte nga wala siya’y kalabutan sa pagpa-ambush patay kang Maria Reyna-Xavier University Hospital medical director Dr Raul Winston Andutan Jr diha sa Brgy Nazareth ning syudad sa miaging Disyembre 2021.
Kini subay sa giluwatang pahayag sa abogado ni Gepte nga si Atty Silva Sabio kinsa maoy nagkumbensir sa iyang kliyente nga mo-surender ngadto kang Police Regional Office 10 Director Brig Gen Benjamin Acorda Jr sa miaging adlaw’ng Domingo.
Gibutyag ni Sabio nga kini ang rason nga isog sila nga mitahan sa PNP kay andam nila pamatud-an atubangan sa korte nga dili tinood nga si Gepte ang utok sa pagpapatay kang Andutan.
Gikasuhan sa murder si Gepte tungod sa mga testimonya sa tulo ka suspected gun for hire nga nadakpan sa PNP sa residential address niini sa Brgy San Alonzo,Balingoan sa milabay’ng Disyembre 3.
Samtang giila ni Acorda ang importanteng partisipasyon sa publiko rason nga hinay-hinay nang miligid ang dagan sa kasong murder batok sa grupo ni Gepte.
Kini ang reaksyon sa heneral nunot sa pagtahan ni Gepte ngadto kanila ni City Police Director Col Aaron Mandia gikan sa mga kustodiya sa mga madre diha sa Carmelites Monastery sa Brgy Camaman-an ning syudad.
Gibutyag ni Acorda nga kadaugan kini sa ilang tropa kinsa paspas nga mihimo’g aksyon aron masikop ang mga akusado sa kremin.
