CAGAYAN DE ORO CITY – Gipangita karon sa kapolisan ang suspek pagpusil-patay sa 26 anyos nga trabahante tungod sa isyu sa ‘love triangle’ diha sa Purok 6,Sitio Baloy,Brgy Tablon ning syudad kagabii.
Giila ni Police Executive Master Sgt Olympio Ranulo Jr sa Cugman Police Station ang biktima nga si Mark Fernandez,ulitawo nga trabahante sa AJ Woods ug nagpuyo sa lugar.
Nasuta sa pasiunang imbestigasyon nga dunay gi-relasyon nga babayeng minyo ang biktima ug gitoohan nga ang wala mailang bana ang mihimo sa pagpamusil gamit ang kalibre 38 nga armas.
Naigo ang likod ug milahos sa dughan sa biktima ang bala hinungdan sa kamatayon niini.
Samaron usab ang laing menor de edad sa dihang mibanda sa kamot niini ang bala nga miigo ngadto kang Fernandez.
