CAGAYAN DE ORO CITY – Pasilotan ni Provincial Gov Bambi Emano ang pipila ka jail guards kon mapatud-an nga dunay pakig-kunsabo sa mga piniriso aron kaylap pa gihapon ang ilegal nga droga sulod sa Misamis Oriental Provincial Jail nga nakabase ning syudad.
Kini tungod sa pagkasikop sa babayeng mabdos nga si Alicia Ismael ug habal-habal driver nga si Rogelio Bacus nga nasapon mi-itsa sa dul-an 200-mil pesos nga balor sa gitoohang shabu sulod sa MOPJ compound.
Gibutyag sa gobernador kon dunay nakasulod nga dakong balor sa shabu,nagkahulugan nga dugay na kining gihimo sa pipila ka piniriso kuyog ang pipila ka jail guards sa maong prisohan.
Samtang gikompirmar ni MOPJ Wardern retired Police Col Robert Roy Bahian nga gilayon na nila gi-imbestigaran ang pipila ka piniriso ug jail guards nga naka-duty sa dihang dunay nakasulod nga illegal nga droga sa maong prisohan.
Miingon si Bahian nga kabahin sa imbestigasyon ang pipila ka ‘trustees’ o mga sinaligan nga mga binilanggo aron paspas masuta kon nganong nakahigayon ang akusado nga si Salic Bato nga mapadal-an ni Alicia Ismael sa gitoohang shabu samtang detinado.
Mapun-an ang kasong kriminal ni Bato samtang apil usab sa ilang kasuhan si Ismael ug ang habal-habal driver nga si Bacus.
Dugtong niini,nakasuhan na sa pagsupak RA 9165 ang buros, habal-habal driver ug receiver sa halos 200-mil pesos nga balor sa shabu nga nasapong gilabay diha sa Misamis Oriental Provincial Jail.
Gibutyag ni Cogon Police Station commander Major Julius Saluta nga gilakip nila pagkaso ang habal-habal driver ug gihatag nalang sa korte ang paghukom sa depensa niini.
Saysay ni Saluta nga kasamtangang nakakustudiya sa ilang opinsina ang buros nga si Alicia Ismael ug driver nga si Bacus.
