CAGAYAN DE ORO CITY –Gidala na karon sa ospital ang usa ka lalaki nga giingong gipusil sa security guard sa gawas nga bahin sa SM Downtown Premier ning syudad.
Gibutyag ni Cogon Police Station Maj Julius Saluta nga subay sa mga saksi sa hitabo, ang biktima nga si Kenneth Casimero, 19 anyos, taga- Upper Sambong, Indahag ning syudad, gilakag sa managsoon nga si Ivan ug Icon Neri tungod kay nang-scam.
Nadunggan lamang sa security guard, kinsa nadestino sa usa ka bangko sulod sa maong mall ang pagsinggit sa managsoon sa ‘kawatan’.
Gilayog kini sa sekyu apan misukol ang biktima ug midagan sa gawas sa mall.
Daw plano lamang sa sekyu pusilon ang biktima sa tiil apan naigo kini ibabaw sa iyang sampot.
Sa pagkakaron, imbestigaran pa sa kapulisan ang background ni Casimero samtang gitin-aw usab sa mga otoridad nga kompleto ug papeles ang maong sekyu ug igo lamang niini gibuhat ang iyang trabaho.
