CAGAYAN DE ORO CITY –Nasikop sa ikaupat nga higayon sa kapolisan ang giingong kanhi mayor sa usa sa mga selda sa city jail tungod sa pagbalig’yag ilegal nga droga diha sa Purok 3,Sitio Da-o,Brgy Gusa ning syudad kagabii.
Giila ni Gusa Brgy Kag. Camilo Sacala ang suspek nga Richard Chong,43 anyos nga residente sa lugar.
Miingon si Sacala nga notado na sa ilang lugar ang suspek hinungdang makapila na usab kini nasulod sa Lumbia City Jail tungod sa kasong pagbaligya sa ilegal nga droga.
Nakuha sa grupo ni Nazareth Police Station commander Maj Allan Cairel gikan sa suspek ang 1.3 milyon pesos nga gitoohang shabu nga gisaksihan usab ni COCPO deputy director for operations Lt Col Ariel Philip Pontillas atol sa ilang operasyon batok suspek kagabii.
Gihimakak ni Chong nga iya ang nakuha nga gitoohang shabu gikan kaniya apan giangkon usab niini nga siya ang tag-iya sa kalibre 45 nga anaa sa posisyon niini atol sa operasyon.
Nasuta nga sakop sa gikaitapang grupong Batang Mindanao o BM 29 ang suspek.
