CAGAYAN DE ORO CITY – Mag-atubang sa kasong murder,frustrated murder ug pagsupak sa election gun ban ang aktibong kagawad nga namusil-patay sa lalaki ug empleyado sa brgy sa Brgy Macasandig ning syudad.
Giila ni Nazareth Police Station commander Maj Allan Cairel ang namatay nga si Anthony Espina,hingkod ang edad ug nagpuyo sa Zamboanga Sibugay nga kasamtangang ngpuyo ning syudad.
Maoy kasuhan nila si Brgy 3 Kag Jonathan Borja kinsa giingong miangkon nga napusilan niya si Espina ug Pet Jagualing kay siya gikulata samtang nag-inom sila sa miaging kadlawon.
Apan itugyan na lang sa PNP ang pag-resolbar sa maong mga kaso nga ipasaka batok Borja nga detinado ning panahona sa kapolisan.
Samtang tabangan sa pamunuan ni Macasandig Punong Brgy Amor Sanchez ang mga biktima sa pagpamusil batok Borja kon may mga kaso na nga masaka sa korte.
Miingon si Sanchez nga andam sila mo-testigo ilabina ang ilang empleyado nga si Pet Jagualing nga samaron kay giapil pagpusil ni Borja.
Una nang nakuha ni Sanchez ang impormasyon nga maoy giawayan sa duha ka panig ang politika ilabina kon kinsa sa duha ka bise-mayor nga kandidato sa syudad ang angay pilion sa eleksyon.
Narekober sa crime scene ang walo ka basiyo ug ang mismong kalibre 45 nga gigamit sa mitahan nga suspek pagkahuman sa kremin.
Sa pikas bahin,kumbinsido si Brgy 3 Kapitan Ely Adoraflor nga self-defense ang gihimo sa kaubang opisyal nga si Borja dihang nagkapusil diin nagresulta sa pagkakalas sa usa ka kinabuhi.
Gibutyag ni Adoraflor nga maayong opisyal si Borja dihang makauban sa ilang barangay.
Matud ni Adoraflor nga walay laing kalambigitan ang konsehal gawas niadtong napusilan kini.
Hisayrang detinado pa si Borja sa mini-cell sa Nazareth Police Station hangtod ning panahona.
