CAGAYAN DE ORO CITY – Giklaro ni COCPO City Director Col Aaron Mandia nga dili konektado ang pagpusil-patay sa duha ka security guard officials sa magkalahing lugar dinhi sa syudad.
Kini human unang gika-alarma sa mga negosyante ug katawhan ang sunod-sunod nga pagpusil sa mga biktima nga sila Lorcidito Zamayla sa Brgy Camaman-an ug Ritchel Lor sa Brgy Kauswagan ning syudad.
Gibutyag ni Mandia nga padayon ang imbestigasyon sa iyang station commanders aron masulbad ang kamatayon sa mga biktima.
Samtang mihimo usab sa kaugalingong imbestigasyon bisan ang Regional Civil Security Unit 10 sa pagpusil-patay sa motorcycle in tandem suspects sa duha ka head guards sa pipila ka security agency ning syudad.
Miingon si RCSU-10 Director Lt Col Gilbert Menova nga tuyo niini nga mapadali ang pagsulbad sa kamatayon ni Zamayla ug Lor nga pulos gitiran sa wala ilhing mga suspek nga lulan sa motorsiklo sa miaging mg adlaw.
Gibutyag sa opisyal nga gilayon usab nila gitigom ang kadagkuan sa nagkadaiyang security agencies sa rehiyon aron mahan-ay ang mga lakang nga pang-alkontra batok sa mga kriminal.
