CAGAYAN DE ORO CITY – Nakit-ang patay ug nagkadugo ang babayeng empleyado sa Bureau of Customs nga nakabase sa Mindanao Container Terminal sa giabangan niini nga apartment sa Gracia Compound,Zone 5,Brgy Agusan ning syudad kagabii.
Giila ni Puerto Police Station commander Maj Peter Tajor ang biktima nga si Verna Mae Gumilao,44 anyos,may mga anak ug lumad nga taga-Ozamiz City.
Miingon si Tajor nga subay sa ilang inisyal nga pakisusi nga dunay komosyon nga nahitabo tali sa giingong kanhi hinigugma niini ayha nakit-an ang patay’ng lawas sa biktima.
Nagbaton sa bun-og sa ulo ang biktima nga gitoohang rason sa iyang kamatayon.
Samtang gitudlo sa kabanay sa biktima nga ang kanhi hinigugma niini nga si alyas Toting ang responsable sa kamatayon sa ni Gumilao ning dakbayan.
Miingon ang ig-agaw nga si John Carlo Ponce nga mismo ang pipila ka renters ang nakakita sa presensiya ni alyas Toting nga ulahing misulod sa lawak ni Gumilao ug may natigayon nga komosyon.
Gitratar na sa PNP nga person of interest si alyas Toting sa kamatayon sa biktima.
