CAGAYAN DE ORO CITY – Gihatagan karon sa Police Regional Office 10 sa hugot nga seguridad ang commanding officer sa CPP-NPA sa Sub-Regional Committee 5 sa North Central Mindanao Regional Committee o NCRMRC nga naglihok sa bukiran sa Brgy San Rafael,Talakag,Bukidnon.
Kini sa tuyo nga dili maku-ot sa aktibong mga kauban ang mitahan nga si alyas Brabong sa Camp Alagar kagahapong adlawa.
Gibutyag ni PRO 10 Director Brig Gen Benjamin Acorda Jr nga subay sa rebelasyon ni alyas Brabong,iyang grupo ang midagit sa aktibong pulis kaniadto sa Kalilangang PNP sa Bukidnon ug utok usab sa pagpangilkil sa mga negosyante,construction companies ug bisan sa mga kabus nga mag-uuma.
Miingon si Acorda nga dala pagtahan sa maong NPA official ang M72 light anti-tank weapon caliber 66mm rocket launcher ug M1919 browning caliber 30 machine gun nga dunay 228 ka rounds mga bala.
Napasayon ug luwas ang pagsalikway ni Brabdong sa armadong kalihukan tungod sa operasyon sa regional intelligence division sa Alagar aron kini ipaubos sa programang E-CLIP sa kagamhanan.
