CAGAYAN DE ORO CITY – Gihupay sa Police Regional Office 10 ang gibating kahingawa sa publiko kabahin sa sunod-sunod nga pagbusikad sa bomba sa pipila ka syudad sa Mindanao.
Kini human ulahing nabuthan sa duha ka bomba ang bus terminal ug porsyon sa food chain nga nakabase sa Isabela City,Basilan sa miaging gabii.
Gibutyag ni PR0 10 spokesperson Lt Col Michelle Olaivar nga kapugngan ang susamang hitabo kon anaa ang pagpakabana sa tanan batok sa mga kaaway sa kagamhanan.
Hinoon,namahayag kini nga may koordinasyon na sila sa ubang law enforcement agencies sa pagsiguro nga dili malutsan ang seguridad sa rehiyon partikular dinhi sa dakbayan.
Samtang gikonsiderar sa PRO 10 nga hayan may motibo sa terorismo ang unang mga pagbuto sa bomba sa mga syudad sa Tacurong,Koronadal ug Isabela,Basilan sulod sa Mayo ning tuiga.
Kini bisan kon unang milugwa sa imbestigasyon nga extortion o pagpangilkil ang katuyuan sa mga mihimo sa bomb explosions punting sa target business establishments niini.
Gibutyag ni Olaivar nga sa ngalan nga mohatag sa kahadlok sa publiko ang bomb explosion,kabahin kini sa elemento sa pagsabwag terorismo.
Kini ang rason nga gimando sa Camp Crame sa tanang lower units nga hugtan ang 24/7 checkpoints aron pugngan masubli ang maong bombing incidents.
