(Update) CAGAYAN DE ORO CITY – Gisugdan na’g subay sa intelligence division o R2 sa Camp Alagar ang koneksyon sa nadakpan nga suspected bigtime drug courier pinaagi sa anti-drug buy bust operation sa Masterson Avenue,Brgy Lumbia ning syudad.
Kini human nakasuhan na sa pagsupak sa duha ka probisyon sa Dangerous Drugs Act of 2002 ang respondent nga si Jonel Curay,26 anyos nga taga-Gingoog City,Misamis Oriental.
Gibutyag ni Lumbia Police Station commander Maj Aldrin Baculio nga tungod sa kadako sa nakompiska gikan sa respondent,gitratar nila kini nga high value individual.
Gipasabot niini nga dili imposible nga dakong sindikato sa ilegal nga droga ang naghawid kang Curay ilabina nga sakop sa iyang pagbaligya’g ilegal nga droga ang Misamis Oriental,Bukidnon ug dinhi sa dakbayan.
Si Curay ang nakuhaan sa 600 gramos nga gitoohang shabu nga dunay street value nga sobra 4 milyones pesos.
Dugtong niini,gipanganti sa liderato sa Cagayan de Oro City Police Office nga gukdon ug bungkagon ang dagkong mga sindikato nga utok sa ilegal nga droga nga gisabwag dinhi sa dakbayan.
Gihimo ni COCPO City Director Col Aaron Mandia ang panganti dungan usab sa sugo ni DILG Sec.Benjamin Abalos Jr nga tumbukon ang punuan ug dili lamang ang mga sanga sa mga sindikato sa ilegal nga droga ang puhagon aron dili magbalik-balik ang problema.
Panganti kini sa opisyal nunot usab sa pagkasikop ni Curay nga nabawian sa balor 4 milyones pesos nga gitoohang shabu sa operasyon sa Lumbia Police Station 8 ning syudad sa miaging adlaw.
