(Update) CAGAYAN DE ORO CITY – Napasaka na ang kasong ‘adultery’ batok sa gitoohang magka-relasyong school principal ug maestra nga pulos ubos sa DepEd- Cagayan de Oro Division sa piskalya ning syudad kagahapon sa buntag.
Kini ang kompirmasyon ni Carmen Police Station commander P/Maj Mario Mantala Jr nga nangunay sa pagpa-imbestigar sa reklamo bana nga sundalo batok sa iyang kaugalingong kapikas ug school principal nga giingong ka-relasyon niini.
Miingon si Mantala nga bugtong ang sundalo nga kabahin sa aktong nakasapon sa duruha sulod sa lodging house ang misang-at sa kasong kriminal sa piskalya ug pabiling nagpakahilom lamang ang kapikas sa school principal.
Hinoon,mapiyansahan ang maong kaso aron temporaryong makagawas ang mga dinakpan.
Dugtong niini,molusad sa ‘fact-finding inquiry’ ang kadagkuan sa Dep-Ed Cagayan de Oro batok sa pasangil nga gilambigitan sa adultery respondents.
Miingon si DepEd City Asst Schools Division Superintendent Dr. Loberina Carrasco nga nakurat sila pag-ayo sa kalit pagbuto sa isyu pinaagi sa social media sa miaging semana.
Gibutyag ni Carrasco nga tuyo sa ‘in-house’ inquiry nga masuta kon dunay tulubagon ang duruha aron mahimong basehan nga ipaubos kini sa preventive suspension samtang magdagan ang kaso.
Mag-agad usab sila kon moduso pa’g kasong administratibo ang bana nga sundalo sa ilang principal ug maestra nga basehan aron kini tangtangon sa tagsa-tagsa nila ka trabaho.
Dumduman nga pipila ka oras gikan sa pagkasikop sa kapolisan sa duruha,gilayong gisulaya’g hinabi sa Bombo Radyo kabahin sa hitabo apan sila nagdumili sa paghatag komento.
