CAGAYAN DE ORO CITY – Nangayo’g tabang sa 4th ID,Philipine Army ang kanhi sakop sa rebeldeng New People’s Army nga nadakpan nagdala’g armas sa checkpoint samtang gikan sa diha sa Camp Evangelista,Brgy Patag ning syudad ug pauli na unta sa Cabanglasan,Bukidnon.
Kini human nabawi sa kapolisan ang kalibre 45 nga armas ni Eval Dum-ugan samtang sakay sa motorsiklo nga gimaneho ni Cerio Escarte aron unta mopauli na Bukidnon gikan dinhi sa syudad.
Miingon si Dum-ugan nga dili niya talikdan ang iyang kasupakan sa balaod apan unta magpakabana ang mga sundalo nga naghatag kaniya sa maong armas isip pang-depensa sa mga rebelde nga nagtinguha pagpatay kaniya.
Si Dum-ugan aktibo sa NPA sa 10 ka tuig diin daghang higayon nga gika-engkuwentro usab niini ang mga sundalo sa Bukidnon ayha hingpit nakahukom pagbalik sa gobierno.
Dumduman nga gidudahan nga gun for hire ang duruha tungod sa armas ug mga bala nga nabawi gikan kanila samtang naharang sa mga pulis sa Sta. Cecilia Village,Brgy Gusa ning syudad miaging semana.
