CAGAYAN DE ORO CITY – Wala mapusli sa usa ka ‘construction worker’ ang 20-mil pesos nga iyang nadag-an sa ‘drinking challenge’ diha sa Purok 4, Brgy. Looc, Villanueva, Misamis Oriental.
Kini human namatay ang 29-anyos nga si Rechie Dumalaon kay wala ma-agwanta sa iyang lawas ang giyarok niining usa ka botelya sa makahubog nga ilimnon.
Mismo si Dumalaon ang midawat sa challenge sa iyang higala bugti sa dakong premyo apan miresulta kini sa iyang kamatayon.
Nadala pa sa ospital si Dumalaon human kini nakasinati sa ‘lock jaw’ apan wala na masalbar sa mga doktor ang iyang kinabuhi.
Gibutyag ni Police Major Renz Marrion Serrano, hepe sa Villanueva Municipal Police Station nga posibleng wala makaya sa lawas sa biktima ang gi-inom niining bino tungod sa sakit sa kasing-kasing nga iyang gihambin.
Hinoon, nagpadayon ang imbestigasyon sa kapolisan sa maong panghitabo.
