(Update) CAGAYAN DE ORO CITY – Gitawag nga ‘lousy’ ni City Vice Mayor Jocelyn ‘Bebot’ Rodriguez ang naglangkob sa Cagayan de Oro City Police Office o COCPO aron mas makamata sa pipila ka dagkong kremin nga natigayon dinhi sa dakbayan.
Kini maoy pagsaysay ni committee on public order and safety ex-officio member Kag.James Judith sa dihang gipatawag sa konseho ang COCPO officials aron ipa-esplikar kon nganong natigayon ang dugu-ong hitabo sa mga batan-on samtang nag-inom sa tulay sa Taguanao,Brgy Indahag sa miaging semana.
Miingon si Judith nga nadismaya sila tungod kay miligid pa sa daghang adlaw ug wala pa gihapo’y naduso nga kasong kriminal sa driver sa Black Hyundai Accent nga namangga sa gikabangi niini nga grupo sa mga batan-on sa maong lugar.
Kini ang hinungdan nga gihagit nila si COCPO Director Col Aaron Mandia nga dali-on ang pagdusog’g kaso aron mahatagan sa hustisya ang upat ka biktima diin usa niini ang nakabsan sa kinabuhi.
Dugtong usab niini,gi-depensa ni City Police Director Col.Aaron Mandia kon nganong naabtan sa pila ka adlaw ang pagsang-at sa kasong kriminal batok sa driver.
Kini human wala kapugngi ni Rodriguez ang paghulagway sa kapolisan nga ‘lousy’ sa pagdungog sa committee on public order sa konseho kabahin sa hitabo.
Miingon si COCPO spokesperson Lt Col Evan Viñas nga mismo si Cogon Police Station commander Maj Julius Saluta ang gusto na masang-at sa kaso apan gimanduan ni Mandia nga han-ayon pa’g maayo ang mga dokumento ug ebedensiya aron kalikayan nga mabasura kini sa piskalya.
Maoy ilang kasuhan sa murder ug multiple physical injuries ang suspek nga si Stephen Neri kinsa maoy nagmaneho sa sakyanan ug gibangaan-patay ang biktima nga si Paul John Levita,22 anyos samtang samaran sila Rufus Levita;Prince Bacalso Lopez,19 ug Jhane Valerie Canonero,18 nga nagsaka sa apartment sa Dolores-Tiano Streets ning syudad.
