CAGAYAN DE ORO CITY – Nakompiskar sa hiniusang operasyon sa kapolisan ang smuggled cigarettes nga gipalusot sa grupo sa mga sindikato pasulod sa Lanao del Sur.
Gibutyag ni Bangsamoro Autonomous Region Police Regional Office Director Brig. Gen John Guyguyon nga maoy naabtan sa tropa sa Malabang Police Station ug 2nd Provincial Mobile Force ang kinahon nga ‘canon’ cigarettes nga dunay bana-bana nga market value nga 435-mil pesos.
Unang nakadawat sa impormasyon ang kapolisan kabahin sa gidiskarga nga mga sigarilyo sa lapyahan sa dagat hinungdang paspas kini nila nga gidalikyatan.
Apan wala na ang mga responsable nga midala sa maong mga sigarilyo rason nga kargamento na lang ang ilang gitugyan sa Bureau of Customs alang sa imbentaryo niini.
Mag-atubang ang mga responsable kon masapon sa pagsupak sa Modernizing the Customs and Tariff Administration Act tungod sa sabotahe sa ekonomiya sa nasud.
