CAGAYAN DE ORO CITY – Gi-depensa sa liderato sa Police Regional Office 10 ang natala nga death cases sa gilusad nga anti-drug operations sa ilang lower units sa nagkadaiyang bahin sa Northern Mindanao.
Kini human kompirmaha ni Police Colonel Wilbur Salaguste,hepe sa operations sa Police Regional Office 10 ang pagkamatay sa tulo ka suspected pushers nga gipaubos sa operasyon sa Bukidnon ug dinhi sa syudad.
Giila ang mga namatay’ng mga biktima nga sila Joseph Paterez nga taga-lungsod sa Quezon ug Albert Colinares nga gikan usab sa munisipyo sa Kibawe nga pulos sakop sa Bukidnon.
Sila ang gipaubos sa operasyon dungan sa pagsilbi sa warrant of arrest sa korte apan giingong nanukol hinungdan sa ilang hinanaling kamatayon.
Sa magkalahi nga anti-drug operations,tipik sa mga pulis nga tuyo modakop unta kanila ang samaron tungod sa pagsukol sa usa sa mga suspek.
Samtang ang namatay nga si Kent John Jabiniar nga tga-Brgy Cugman,Cagayan de Oro City ang unang nakasibat sa paglusob sa kapolisan.
Apan milukso kini sa lapukan nga duol sa dagat hinungdang nalumos-patay kay naglikay nga madakpan sa mga pulis nga naggukod kaniya.
Gidugang ni Salaguste nga sulod sa ikatulong kuwarter ning tuiga sa ilang operasyon,anaa sa 4.6 kilos nga gitoohang shabu ug marijuana ang nakompiskar sa lower units sa rehiyon.
Kini gilakipan sa 2.5 kilos sa gitoohang shabu samtang laing 18 kilos usab sa marijuana.
Nagkantidad kini sa 19 punto 4 milyones pesos ang nakompiskar nga mga ilegal nga droga.
Dugtong niini,nanganti ang liderato ni PRO 10 regional director Brig. Gen. Lawrence Coop nga walay ihatag nga kahigayunan nga makaporma ang mga sindikato sa ilegal nga droga aron ilikay sa kadaot ang katawhan ilabina ang kabataan sa rehiyon.
Gipasalamatan ug gidayeg usab sa PRO 10 ang tanang lower units nga anaa sa maong dagkong kalampusan batok ilegal nga droga ning tuiga.
