(Update) CAGAYAN DE ORO CITY – Patay ang lima ka tawo samtang dul-an 20 ang nadala sa ospital sa ngilgngig nga bangga tali sa Bongo batok Fuzo Fighter trucks sa Zone 2,Barangay Agusan ning syudad kaganihang kadlawon.
Gibutyag ni Police Corporal Rodulfo Abaday,traffic investigator sa Cagayan de Oro City Police Office nga nakabase sa Puerto Police Station nga giila ang driver sa Fuzo Fighter truck nga kargado sa mga buhing manok nga si Julieto Jabagat,minyo nga taga-Baloi,Brgy Tablon ning dakbayan.
Sa inisyal nga imbestigasyon,maoy mibangga ang bongo truck nga kargado sa sobra 20 ka mag-paryente sa pamilyang Pagtalunan nga taga-Brgy Sta.Ana,Tagoloan,Misamis Oriental ngadto sa gimaneho ni Jabagat hinungdan sa aksidente.
Namugos si Jabagat nga naningkamot siya maka-brake apan mismo ang bongo truck ang midasmag hinungdan sa grabeng impact sa hitabo.
Dead on the spot mismo ang driver sa bongo truck ug laing upat ka pasahero niini gumikan sa aksidente.
Nasuta nga mi-biyahe gikan sa Zamboanga del Sur ang mga biktima kagabii ug igo pag-abot sa national highway sa Brgy Agusan natigayon nga ngilngig nga hitabo.
Gikan mitambong sa lubong ang mga biktima sa ilang igsoon sa pagtoo sa Zamboanga apan sa pag-abot-balik sa dakbayan nagkabangga ang duha ka trak.
Detinado si Jabagat sa mini-cell sa PS6 human paspas mitahan aron atubangon ang hitabo.
Sa pagkakaron,gihan-ay na ang kasong reckless imprudence resulting into multiple homicide,multiple physical injuries ug damage to property batok kang Jabagat.
Anaa na usab sa Bollozos Funeral Homes ning syudad ang mga patay’ng lawas sa mga biktima.
