CAGAYAN DE ORO CITY – Nakompiskar ang dul-ag usa ka milyon ka pesos nga balor sa ginadiling droga sa mga operatiba sa Lumbia Police Station sa ilang gilusad nga drug buybust operation diha sa Saarenas St, Westbound Terminal, Brgy. Bulua ning syudad kaganinang kadlawon.
Gibutyag ni Police Maj. Aldren Baculio, hepe sa Lumbia Police Station nga ilang nasikop ang target nga si Laurente Lester, ingon man ang kaipon niini nga si April Manginsay nga taga Dominorog, Talakag, Bukidnon.
Nadakpan usab ang kauban ni Lester nga si Jhubert Paylaran nga taga Cebu City.
Apan miingon si Baculio nga wala nila madakpi ang laing duha ka kauban ni Lester nga sila si Jerico Ochigue ug Dante Morales, kinsa sakay sa Navara pickup nga kolor orange nga nahulog sa pang-pang sa Zone 9, Anhawon, Bulua sa dihang ila kining gigukod.
Na-rekober nila gikan kang Lester ug sa nahulog nga pick-up ang ubay-ubay’ng pakete sa gitoohang shabu nga moabot sa 120 ka gramos ingon man ang magazine ug mga bala sa 45 kalibreng armas.
Giingong nagpabuto pa sa armas ang sakay sa Navara pick-up sa dihang nadakpan sa kapolisan si Lester.
Padayon pang gipangita sa kapolisan ang nakasibat nga mga suspek kinsa gitoohang nga sakop sa dakong sindikato sa ilegal nga droga nga naglihok dinhi sa nasud.
