CAGAYAN DE ORO CITY – Gimando ni City Police Director Col. Aaron Mandia ang dinali-ang pagsulbad sa pagpatay sa kandidato sa Mr. Cagayan de Oro 2023 dinhi sa syudad.
Kini human giporma na niini ang tracke team aron mohimo sa pagpangita sa mga responsable ug pagpalawom sa imbestigasyon sa kamatayon ni Adriane Rovic Fornillo nga taga-Lapaz 2,Brgy Lapasan ning syudad.
Siya miingon nga lakip sa ilang gi-sunod nga anggulo ang dunay kalabutan sa gisalmutang indigay sa biktima ning tuiga.
Kini subay usab sa inisyal nga imbestigasyon sa kapolisan diha sa Macasandig Police Station human nila nahinabi ang pipila ka tawo nga duol sa biktima.
Mibisita ang biktima sa iyang higala diha sa Nazareth dihang gipusil kini sa wala ma-ilang suspek nga nag-resulta sa iyang kamatayon.
Nagtoo usab si Mandia nga planado ang pagpatay sa biktima.
Samtang bisan si City Vice Mayor Jocelyn Rodriguez nanghinaut nga masulbad sa daling panahon ang pagpatay kang Fornillo.
Miingon si Rodriguez nga angay ma-aresto sa daling panahon ang mga suspek sa krimen aron mahatagan sa hustisya ang biktima.
Una niini, gibutyag sa kapolisan nga planado ang pagpatay sa biktima.
Si Fornillo ang nagbaton sa usa lang kaigo pinusilan apan mismo sa iyang ulo.
Samtang nagtoo ang pamilyang Fornillo nga dunay laing rason kon nganong gipusil-patay si Adriane sa syudad sa miaging gabii.
Miingon ang amahan nga si Noy Fornillo nga lahi ang iyang pamati apan itugyan na lang nila kini sa kapolisan nga maoy mosulbad sa kamatayon sa ilang anak.
Namugos kini nga buotan ang iyang anak ug walay bisan usa nga kontra sa ilang lugar o sa tunghaan.
Si Fornillos ang graduating student sa kursong civil engineering sa Liceo de Cagayan University ning tuiga.
