CAGAYAN DE ORO CITY, Philippines – Gitambungan sa 18 ka mga dagkong lider sa Europa, Canada, ug Turkey ang Ukraine Summit nga gipahigayon sa Lancaster House sa London.
Gi-inisyar ang pagpulong ni British Prime Minister Sir Keir Starmer nga walay hunong ang pagpaningkamot nga madag-an sa Ukraine ang malinawon nga pagpa-undang sa gubat tali sa gobyerno ni Russian President Vladimir Putin.
Ang summit personal nga gitambungan nila French President Emmanuel Macron nga unang namahayag nga mupalig-on sa armas-militar sa Kiev.
Gipamugos ni German Chancellor Olaf Scholz ang pagdepensa sa soberiniya ug demokrasya sa mga Ukrainians nga gustong idumala sa gobyerno sa Moscow.
Usa si Ursula von der Leyen, Presidente sa European Commission, ang nagpadayag sa suporta kang Zelenskyy human kini pakaulawi ni US President Donald Trump ug Vice President JD Vance.
Miingon si Von der Leyen nga mibilib kini sa kaisog ug maayong dignidad sa presidente sa Ukraine, taliwala sa pagdagmal kaniya.
Sa pikas bahin, gipaniguro ni North Atlantic Treaty Organization (NATO) Secretary General Mark Rutte ang panaghiusa sa mga kaalyadong nasud sa Ukraine aron makab-ot ang ilang gipangandoy nga kalinaw pinaagi sa entrahan nga peace deal.
Ang ubang attendees sa summit gilangkoban nila Italian Prime Minister Giorgia Meloni, Canadian Prime Minister Justin Trudeau, Spanish Prime Minister Pedro Sánchez, Finnish President Alexander Stubb, President of the European Council Antonio Costa, Polish Prime Minister Donald Tusk, Turkish Minister of Foreign Affairs Hakan Fidan, Danish Prime Minister Mette Frederiksen, Romanian Interim President Ilie Bolojan, Swedish Prime Minister Ulf Kristersson, Czech Republic Prime Minister Petr Fiala, Norwegian Prime Minister Jonas Gahr Store, ug Dutch Prime Minister Dick Schoof.
Sa gilusad nga press conference, gi-anunsyo ni Prime Minister Starmer ang pagpautang sa Ukrainian Government sa 2.2 billion pounds para sa bag-ong 5,000 air defense missiles sa military troops sa Ukraine.
Gitin-aw ni Starmer nga ang nasampit nga salapi wala nagsumikad sa kwarta sa taxpayers sa ilang nasud, apan gikan sa Russian frozen assets nga gihuptan sa ilang gobyerno.
