CAGAYAN DE ORO CITY – Igo pa gani nahupay ang gibating pagbangutan ug kagul-anan sa halos 20 ka mag-paryente kay mitambong sa paglubong sa namatay nila nga kabanay, laing kasub-anan na usab ang mihabol kanila sa lungsod sa Villanueva,Misamis Oriental.
Kini human kompirmaha ni Villanueva Municipal Information Officer Cyril Cambalon Jr nga patay gilayon ang 22 anyos nga dalaga nga nakasakay sa front seat sa mini van diin lulan ang 14 ka tawo nga naglakip sa nagmaneho nga drayber diin nahulog sa gatos ka tiil nga gilawmon gikan sa barangay road sa Sitio Tagbalugo,Brgy Dayawan.
Giila ni Cambalon ang namatay’ng biktima nga si Lyn-Lyn Zambas, 22 anyos nga taga- Zone 3,Brgy Sta. Cruz,Tagoloan ning lalawigan.
Siya miingon nga sa ilang pag-responde,anaa sa 14 ka biktima ang nahiagom sa mga samad ug bun-og tungod sa pagkahulog sa sakyanan sa pangpang.
Miingon si Cambalon samtang gikan sa Villanueva ang mga biktima,miagi sila sa maong sityo aron mapadali ang pagsulod sa lungsod sa Tagoloan apan wala na mohawid ang preno sa van pag-abot sa lugsungon ug liku-on nga bahin hinungdan milahos sa ubos.
Gilayong gidala sa Northern Mindanao Medical Center ang mga samarong biktima dihang paspas sila gipanghaw-as sa municipal disaster risk reduction offices sa duha ka lungsod kagahapon sa buntag.
