CAGAYAN DE ORO CITY – Luwas ang walo ka tawo nga gilakipan sa pito ka pasahero ug drayber nunot sa panabangga sa passenger van ug trak nga kargado sa mga buhing manok sa highway sa Purok 4,Brgy Burnay,Maria,Gitagum,Misamis Oriental.
Kini bisan nga nagbaton sa nagkadaiyang bun-og ug mga samad ang mga pasahero nga sakay sa van nga padulong sa Iligan City samtang pasulod usab sa Cagayan de Oro ang trak sa dihang natigayon ang aksidente.
Giila ang mga samaron nga sila Gleen Rances,John Rey Ral, Melody Fair Mabaylan, Mark Anthony Pareja,Rechel Mae Cadarero, Asthea Mirrah Torrecampo ug drayber nga si Jay Abejo nga pulos taga- Cagayan de Oro.
Subay sa pasiunang impormasyon, kalit mitipas ang passenger van sa dalan nga gisubay sa trak nga gimaneho ni Jubert Paculba nga taga-Bukidnon hinungdang gitinguha nga maka-mani-obra makalikay apan naapiki na rason natigayon ang panabangga.
Hinoon,wala maunsa ang mga kauban ni Paculba nga sila Junie Java ug Joeffrey Eliccion nga taga-Tagoloan ning lalawigan taliwala sa maong aksidente.
Gipangdala sa Gitagum Police Station sila Abejo ug Paculba aron kuhaan pa sa dugang impormasyon sanglit gihulat ang aksyon nga himoon sa mga pasahero kung moduso’g kaso nunot sa hitabo.
Wala pa’y komento ang provincial government sa Misamis Oriental sa impormasyon nga giingong ilang mga empleyado ang maong mga pasahero nga nadisgrasya.
