CAGAYAN DE ORO CITY – Gitukmod sa Commission on Elections o Comelec ang mga kandidatong local nga gamiton ang duha ka adlaw nga ‘holidays’ nga sila maghinuklog sulod ning panahon sa semana santa.
Gihimo ni Misamis Oriental Provincial Election Supervisor Atty. Carlito Ravelo ang mensahe nunot sa kusganong pagdili sa balaod nga makahimo’g kampanya ang mga kandidato sa adlaw’ng Huwebes ug Biyernes ning semanaha.
Miingon si Ravelo nga isip mga kandidato sila,angayang mamalandong ug mangaliya usa kini aron masukod kung angayan ba nga mopapili ug mohupot sa katungdanan paghuman sa May 12 elections.
Siya miingon nga dili lang angay magpasagad ang mga kandidato nga mangahas pagpangampanya sa maong mga adlaw kay bug-at nga silot sa balaod ngadto sa mga mangasapon niini.
Hisayrang hugot gidili ang direkta ug indirekta nga kampanya sa mga kandidato sa maong mga adlaw aron kalikayan ang pagka-diskuwalipikar ug mag-atubang sa kasong kriminal.
