(Update) CAGAYAN DE ORO CITY – Mohimo sa subsbo nga imbestigasyon ang Cagayan de Oro City Police Office o COCPO kabahin sa nahitabong pagkalungkab sa buhatan ni interim Cagayan de Oro Water District General Manager Fermin Jarales sa Corrales Avenue ning syudad.
Kini human adunay puwersado nga pagsulod sa entrada nga bahin sa COWD diin tinuyo nga giguba aron masulod ang buhatan ni Jarales.
Una nang nangakusar ang grupo ni acting regular COWD General Manager Engr Edna Najeal nga mismo si Jarales kuyog ang iyang dala nga mga nakataptap nga mga sakop ang puwersadong misulod sa opisina aron pangbitbiton ang mga papeles paggawas.
Apan sa panig usab ni Jarales,grupo ni Najeal ang puwersadong misulod sa iyang opisina ug gipangkuha ang mga importanteng mga dokumento ug giingong mga papeles kabahin napasaka nila nga kaso sa pipila ka empleyado sa COWD.
Miingon si Cogon Police Station commander Major Sabino Labitad nga gusto nila makuha ang tanang panig aron makamugna sa ensaktong resulta sa imbestigasyon.
Kini tungod kay unang mipalag si Najeal kung nganong wala pangdakpa sa mga pulis ug libreng nakagawas ang grupo ni Jarales sa opisina taliwala sa hitabo.
Apan miingon si Labitad nga nagmaigmat sila sa gihimo nila nga aksyon kay notado na nga adunay dakong bangi ang kampo ni Jarales ug Najeal.
Gibutyag niini nga dili nila mapatuman ang warrantless arrest kay wala sila aktuwal makakita sa pasangil nga grupo ni Jarales ang miguba sa opisina ug nanguha sa mga dokumento.
Kini ang rason nga gilayong gikuha ni City Police Director Col. Salvador Radam ang mga dokumento gikan sa sakyanan ni Jarales aron ipaubos sa imbentaryo nga saksihan sa duha ka panig.
