CAGAYAN DE ORO CITY – Kasuhan sa murder sa kapolisan ang kargador nga gitudlong suspek pagpatay sa menor de edad nga babaye nga gilubong sa tangkungan sa Mambato,Agora,Brgy Lapasan ning syudad.
Kini human paspas nadakpan sa hiniusang operasyon sa Agora Police Station ug Initao Municipal Police Station ang suspek nga si Sanny Boy Ratunil alyas Boy Tangkol sa gitaguan niini nga kabanay sa lungsod sa Initao ning lalawigan kagabii.
Gibutyag ni Police Regional Office 10 spokesperson Major Joann Navarro nga nagbalhin-balhin sa lokasyon ang suspek aron makalikay sa pagdakop apan nalukong ra gihapon kini ug nasignit sa mga otoridad sa Purok 11,Brgy Población sa Initao.
Gilayong gipaabot ni PRO 10 Director Brig Gen Jaysen De Guzman ang iyang pagtimbaya sa lower units nga wala hunungi ang pagpangita sa suspek aron mahatagan sa hustisya ang biktimang babaye nga taga-Brgy Pinikit,Sultan Naga Dimaporo,Lanao del Norte.
Dumduman nga unang gitoohan nga gilugos una sa suspek ang biktima ug pagkahuman gipatay gamit ang sundang diin nagbaton sa tinigbasan sa liog ayha gilubong sa ilawom sa tangkungan.
Apan adunay nakakita sa gihimo sa suspek hinungdan nga paspas kining gipangita hinungdan sa pagka-aresto ug kasuhan sa piskalya ugmang adlawa.
Hisayrang limitado lang ang komento sa suspek dihang gipaubos sa imbestigasyon kung nganong nahimo niini ang kremin.
