Gisang-atan ni Duterte Youth partylist Rep. Ronald Cardema ug iyang kapikas kanhi lawmaker Marie Cardema sa impeachment complaint ang ilang maninoy sa kasal nga si Pres Bongbong Marcos sa kamarabaha.
Kini aron tukion sa liderato sa Kamarabaha ang ilang pasangil ug gitoohan nga kasupakan sa konstitusyon ang pagtugyan ni Marcos kang kanhi Pres Rodrigo Duterte sa International Criminal Court o ICC didto sa The Netherlands niadtong Pebrero 11 ning tuiga.
Namahayag ang magtiayong loyalista kang Duterte nga dili haom sa kasuguan sa balaod nga dakpon kanhi presidente taliwala nga mismo si Marcos ang makapila nagbalik-balik pagsulti nga wala na’y hurisdiksyon ang ICC sa Pilipinas ug wala usa’y angay pagsanong sa mga lakang niini.
Kini ang rason nga gidason nila ang impeachment complaint kay nagtoo sila nga nakahimo’g dayag nga kasupakan sa konstitusyon si Marcos ug nagbudhi sa pagsalig sa katawhan sa nasud.
Kini gumikan kay mismo si Marcos ang nagtugyan kang Duterte sa ICC nga unta adunay kaugalingong soberenya ang Pilipinas ug angay sundon ang mga balaod nga gipatuman niini.
Sa pagkutlo ning balita, wala pa’y reaksyon si Marcos ug Malakanyang kabahin sa pinakaunang impeachment complaint nga giduso ni Cardema sa kamarabaha diin gihawiran ni Speaker Martin Romualdez.
Wala pa usa’y kasikas gikan sa mga Duterte kabahin niini ilabina kang Vice Pres Sara Duterte nag-atubang usab sa impeachment complaint sa senado epekto sa mani-obra gihapon sa administrasyon.
