CAGAYAN DE ORO CITY – Nagpaabot pasalamat si kanhi City Mayor Atty. Oscar Moreno ngadto sa mga solidong nag-suporta sa Team Padayon OSM nga mikuyog sa ilang pakigsugod sa unang adlaw hangtod sa mismong eleksyon sa Mayo 12 ning tuiga.
Kini subay sa nalatid sa gimantala nga pahayag sa kanhi mayor pipila ka oras gikan sa pag-proklomar sa mga mananaug gikan sa pinakataas nga katungdanan padulong sa pagka-konsehal sa dakbayan sa city board of canvassers sa city council ning syudad.
Matud ni Moreno nga tungod sa paghukom na sa katawhan,angayang tahuron na kini ug dawaton sa katibuk-an.
Siya miingon nga unta nakab-ot nga hukom sa katawhan sa bag-uhay’ng bugnong lugaynon,iyang panghinaut nga mahinuklugan kini sa lawom nga pagpamalandong.
Giklaro usab sa kanhi mayor nga walay gihambin niini nga kaligutgot sa iyang kasingkasing apan ang naghinobrang pagpasalamat.
Gihinaut ni Moreno nga unta anaa sa maayong kahimtang ang dakbayan sa umaabot nga pagligid sa mga adlaw ug magbaton sa tinud-anay nga pagdumala sa mga modumala niini.
Gitapos sa kanhi mayor ang iyang pahayag nga magpadayon kini kung unsa man ang gibarugan,gihaguan ug gipakigbisugan sa bando Padayon OSM.
Hisayrang sa linya ni Moreno ning maong eleksyon,sila si re-electionist Cagayan de Oro 1st District Cong. Lordan Suan,1st City Councilors Aga Suan,Imee Moreno ug 2nd District City Councilor Yvy Emano ang nakalampos batok sa bando ni City Mayor Rolando Klarex Uy.
