Gipalugwa na sa Vatican Office for Liturgical Celebrations of the Supreme Pontiff ang hulagway sa bag-ong singsing sa Santo Papa o mas naila isip Ring of the Fisherman.
Gitakda kining ihatag kang Pope Leo XIV sa ilusad nga Inauguration Mass sa iyang pagka Santo Papa, ning adlawa Mayo 18.
Ang singsing nagdala sa hulagway ni San Pedro ug adunay New Testament roots, nga nagrepresentar sa iyang papel isip unang Santo Papa ug pagsilbing mangingisda sa katawhan.
Kini nga singsing maoy usa sa simbolo sa “papacy” sukad natukod sa ika-13 nga siglo, ug gigamit niadto isip “signet ring” sa pagpirma sa mga opisyal nga dokumento sa Santo Papa.
Sa bag-ong panahon, kini nga singsing nagpabiling simboliko na lamang, apan matag Santo Papa adunay kaugalingong singsing nga nagrepresentar sa iyang pagpanunod sa trono ni San Pedro.
Sa seremonya sa Mayo 18, si Cardinal Luis Antonio Tagle ang magpresentar sa singsing ngadto kang Pope Leo XIV, nga nagpasabot sa iyang pagsugod sa Petrine Ministry.
