CAGAYAN DE ORO CITY – Mosamot ang sagubangon nga kalisdanan sa akusado sa kasupakan sa anti-online sexual abuse ug qualified human trafficking sa korte sa Misamis Occidental.
Kini human silbihi sa mga sakop sa Sapang Dalaga Police Station sa laing warrant of arrest sa akusado nga si alyas Jenjen sa kasong pagsupak sa qualified human trafficking ug ubang grave criminal offenses taliwala nga detinado na sa selda sa provincial jail sa maong lalawigan.
Gisulti ni Police Regional Office 10 spokesperson Major Joann Navarro nga subay sa taho sa Sapang Dalaga PNP nga gisilbi ang mando -de- aresto batok akusado sa bisinidad sa Calamba Municipal Building diin nakabase ang Regional Trial Court Branch 38.
Gibutyag ni Navarro nga duha sa maong mga kaso ang walay gitugot sa korte nga piyansa.
Dugtong niini,gibutyag ni PRO 10 regional director Brig Gen Jaysen De Guzman nga ang krusada sa gobierno nagmatood nga tinguha mahatagan sa dinaliang hustisya ang kabataan nga gihimong kasangkapan sa mga masinupakon sa balaod.
Hisayrang si alyas Jenjen ang unang nadakpan Pebrero 2025 sa hiniusang operasyon sa Women and Children Proection Center- Mindanao Field Unit tungod sa pagbugaw sa iyang kaugalingong 16 anyos nga bayaw-babaye ngadto sa mga langyaw’ng kliyente gamit ang mga law-ay nga mga video.
