CAGAYAN DE ORO CITY – Napugos pag-atras pakigtagbo ang mga gitahasang ulo sa mga departamento ni incumbent Provincial Governor Peter Unabia ngadto sa transition team ni incoming Misamis Oriental Governor Juliette Uy.
Kini human nasuta sa gobernador dihang nagpatawag siya’g tigom nga kulang ang mga gikinahanglang departmental reports nga ilang e-presentarr atubangan sa mga sakop sa gobernadora niadtong Hunyo 11 ning tuiga.
Miingon sa Bombo Radyo si Misamis Oriental Provincial Legal Officer Atty. Niel Pacana nga dili gusto ni Unabia nga maulawan ang kapitolyo-probinsyal nga mangatubang sa Uy transition team nga maglisod o kulang ang mahatag nga mga tubag kabahin sa mga hisgutan nga madiskusyonan sa ikaduhang tigom sa duha ka panig.
Kini ang rason nga nangayo daw sila’g depensa nga wala makatunga sa Uy transition team nga naghulat niadtong adlaw kay adunay mga sakop sa kapitolyo nga wala pa kabalik sa ilang official leaves ug ang uban nagduso na sa paghawa sa trabaho nunot sa kapildihan ni Unabia sa milabay’ng piliay.
Kini ang pagpasabot ni Pacana ngadto sa wala matago nga pagka-dismaya sa mga sakop sa transition team ni Uy.
Nagpadala na lamang sa sulat-pahayag ang buhatan sa kapitolyo-probinsyal nga itugyan ang mga gikinahanglang mga papeles sa mosuluray nga administrasyon sa Hunyo 27 ning tuiga.
Hisayrang mohupas ang termino ni Unabia sa pagka-30 sa Hunyo sa udto ug mobanos usab ang Uy administrasyon alang sa opisyal nga pagsugod sa iyang tulo ka tuig nga pagsilbing gobernador sa lalawigan.
