CAGAYAN DE ORO CITY – Gitahasan ni Philippine National Police/PNP chief Gen Nicolas Torre III si acting Police Regional Office 10 Brig Gen Rolindo Suguilon nga ipalig-on pa ang nasugdang mga reporma sa mga kanhi nangulo sa pamulis sa rehiyon sa Amihang Mindanao.
Kini human ipadala ni Torre si PNP chief directoral staff Lt Gen Edgar Alan Okubo aron mangulo sa pagtugyan ni kanhi PRO 10 Director Brig Gen Jaysen De Guzman sa mga responsobilidad ug mga programa kang Suguilon isip bag-ong amahan sa kapolisan sa rehiyon.
Miingon si Okubo nga maoy gusto nila nga puno sa disiplina ang kapolisan ug taas ang integridad ug mo-sentro sa katawhan ang mga programa susama sa gipatuman ni De Guzman.
Hinoon,dili enstranghero si Suguilon sa rehiyon kay dugay kini nadestino sa PRO 10 ubos sa nagkadaiyang tahas nga naglakip sa pagsilbing kumander sa Regional Mobile Force Batallion 10, provincial director sa Lanao del Norte ug Misamis Occidental PNP ingon man sa command group sulod sa Kampo Alagar.
