CAGAYAN DE ORO CITY – Gihimakak ni incoming 2nd District City Councilor Alam Lim kinsa outgoing president sa Association of Brgy Councils/ABC nga personal nga katagbawan ang iyang nag-unang katuyuan kung nganong pugsanon gipa-resign sa katungdanan si Gusa Brgy Kapitan Marlo Tabac isip bise-presidente sa Liga ng Kapitanes ning syudad.
Namugosi si Lim nga dili niya kinaiya nga tigpasikat ug moyatak sa katungod sa ubang kapitanes ilabina nga suod sila nga higala ni Tabac.
Siya miingon nga gihatagan lamang niya sa aksyon ang singgit sa daghang kapitanes nga daw nawad-an na sa pagsalig ug kumpiyansa nga si Tabac ang magpadayong mangulo sa Liga nga nag-atubang sa daghang isyu.
Una niini, mihimo’g special report si Lim sa katapusang sesyon sa city council niadtong Hunyo 21 diin nag-aghat sa mga kaubang konsehal nga imbestigaran sa hingtungdang mga komitiba batok sa mga isyu giatubang ni Tabac.
