CAGAYAN DE ORO CITY – Mahatagan sa katumanan ang kontrobersyal nga nasampit ni kanhi Misamis Oriental Governor Peter Unabia nga pagbaton sa nursing course nga ipahiluna sa University of Science and Technology of Southern Philippines/USTP campus nga nakabase sa Claveria ning lalawigan.
Gikompirmar ni Unabia atubangan sa mga empleyado sa kapitolyo-probinsyal kinuyugan sa USTP officials ug ubang mga bisita sa katapusang pagtambong niini sa pagpakayab sa nasudnong-bandila nga matuman ang maong programang-edukasyon alang sa mga batan-ong Misamisnons nga gusto mokuha sa kursong nursing.
Kini tungod kay gigahinan na ni re-elected Misamis Oriental 2nd District Cong.Bambi Emano sa pasiunang 15 milyones pesos nga pondo alang sa katukuran sa nursing classroom buildings alang sa kabatan-unan nga anaa sa interes sa nahisgutang kurso.
Masaligon ang duha ka dagkong lideres sa probinsya nga makahatag kini sa dakong paghaw-as sa kalisdanan sa katawhan batok sa kawad-on ug kapit-os sa pag-abot sa panahon.
Nagsilbing flagship program ni Unabia nga suportado nila ni kanhi 1st District Cong. Christian Unabia ug Emano ang pagkahaw-as sa katawhan sa grabeng kawad-on sa matag-pamilya diin sa tuig 2021,mitala kini sa 18.1 porsiento ug naubsan sa 15.5% pag-abot sa 2023.
Hisayrang tinguha sa maong administrasyon nga ikanaug pa sa 8 porsiento ang kapobrehon sa probinsya rason nga bisan dili na kini gobernador,ipadayon ang mga nasugdan nga programa nga motubag sa kawad-on sa Misamisnons.
