CAGAYAN DE ORO CITY – Emosyonal si Misamis Oriental Governor Juliette Uy sa iyang mga nakit-an nga kahimtang sa inisyal upat ka district hospitals nga nahimutang sa unang distrito sa lalawigan.
Kini human nasuta nga naghinobra ang kakulangon sa mga tambal, walay klaro nga pagsuplay sa tubig,barado ang mga pansayan ug gipangtaya ang mga kagamitan sa maong mga ospital.
Gibutyag ni Special Assistant to the Governor Celso Abucejo nga partikular nga ilang gipangsusi ang Magsaysay Provincial District Hospital;Gingoog Provincial District Hospital;Talisayan Provincial District Hospital ug Balingasag Provincial District Hospital diin halos managsama ang ang mga problema.
Siya miingon nga ang pagduaw ni Uy sa mga ospital ang pagtuman sa iyang mga nalitok nga saad sa katawhan nga hataga’g prayoridad ang pangihanglan sa panglawas sa lalawigan.
Namugos usab si Abucejo nga dili pagpangdaot kang kanhi Governor Peter Unabia ang iyang gipanulti apan riyalidad kini nga kahimtang sa district hospitals nga angay mahatagan sa dinaliang kasulbaran.
Dili usab kumbinsido ang bag-ong administrasyon nga gipasagdan ni Unabia ang panginahanglang-panglawas sa probinsya apan possibleng dili kini ang mas prayoridad.
