(Update) CAGAYAN DE ORO CITY – Nag-atubang sa mga kasong kriminal ang pito ka Intsik nga gilangkuban sa lima ka lalaki ug duha ka babaye sa korte ingon man sa Bureau of Immigration/BI sa kauluhan.
Kini human unang nadakpan ang maong Chinese nationals nga aktong midumala ug mipadagan sa illegal gold mining operation sa Brgy Tuburan ning syudad sa miaging semana.
Gibutyag sa Bombo Radyo ni Police Capt Earl Valconcha,hepe sa Misamis Oriental Maritime Police Station nga partikular nakasang-at sa Regional Trial Court Branch 5 ang kasong pagsupak sa Philippine Mining Act of 1995 batok sa mga dinakpan.
Siya miingon nga nasupak sa mga akusado ang pipila sa balaod nga gipatuman sa BI kay nagkupot lang sila sa tourist visa apan mihimo sa mga kalihukang illegal sa bukirang bahin sa dakbayan.
Sa pagronda sa hiniusang operasyon sa PNP Maritime ug ubang mg buhatan sa gobierno,nakompiskar ang daghang kagamitan sa illegal mining nga nagkostar sa 18 milliones pesos.
Sa kasamtangan,detinado na ang mga akusado sa city jail sa BJMP-Cagayan de Oro nga nakabase sa Brgy Lumbia ning syudad.
