Gikostudiya na sa Manolo Fortich Municipal Police Station ang pulis nga nanulis sa 7/11 convenience store sa Barangay Damilag, Manolo Fortich, Bukidnon niadtong Agosto 5, pasado alas 4 sa kadlawon. Klaro kaayo ang dagway sa suspek base sa CCTV footage sa tindahan, ug kini maoy gigamit sa kapulisan sa paglusad sa hot pursuit operation. Ang suspek nakasibat human makuha ang gibana-bana nga ₱12,000 nga salapi ug pipila ka pagkaon gikan sa cashier. Gikompirmar sa mga operatiba nga ang suspek usa ka personahe sa Malaybalay City Police Station ug residente sa Menzi Village, Damilag.
Subay sa imbestigasyon, miangkon ang dinakpan nga siya nagumon sa “online nga sugal,” nga maoy hinungdan sa iyang desperadong lihok. Sa follow up investigation nga gihimo sa BOMBO NEWS TEAM, “augmented personnel” ang suspek nga temporaryong gi-assign sa Malaybalay CPS ug dili regular nga miyembro sa istasyon. Kini maoy gihatag nga katin-awan ni Lt. Col. Joepet B. Paglinawan. Lakip sa narekober sa operasyon mao ang nahibiling salapi ug ang issued firearm nga gigamit sa pagti-on sa cashier. Ang kapulisan nagpadayon sa pag-imbestiga aron masuta kung adunay laing kaso nga nalambigit ang suspek.
Miligid na ang gilusad nga internal investigation sa Bukidnon Provincial Police Office aron kasuhan sa administrative ug criminal charges ang suspek. Gikondena sa lokal nga komunidad ang insidente, nga nagpasidaan sa kahimtang sa mental health ug financial stress sa pipila ka law enforcers. Nanawagan ang mga opisyal sa mas hugot nga screening ug psychological evaluation sa mga personnel nga gi-assign sa field. Gidasig usab ang publiko nga motaho dayon sa mga otoridad kung adunay kahimtang nga makahatag og hulga sa seguridad sa komunidad.
Sa pikas bahin, gihimong pananglitan ni Cagayan de Oro 2nd District Representative Rufus Rodriguez ang pagkahilambigit sa usa ka pulis sa kaso sa pagpanulis. Gikondinar sa kongresista ang paglambigit sa usa ka trabahante sa gobyerno sa sugal ilabe na nga napakita na niini ang dautang epekto sa iyang trabaho ug sa komonidad. Miingon si Rufus nga malikayan man unta ang pagdula sa on line gambling kung adunay kontrol sa kaugalingon ang usa tawo, ilabe na ang mga pulis. Nabalaka si Rufus nga managhan pa ang ingon ani nga klase sa trabahante sa gobyerno kay makadaut kini sa imahe sa Philippine National Police nga maoy gisaligan sa nasud sa pagdakop sa mga kriminal, apan, sila naman himoon ang nag-inisyar sa mga gagmay’ng kremin sa komonidad, nga ika-hadlok sa katawhan.
