Nakauli na si Presidente Ferdinand Marcos Jr. sa Pilipina, human sa iyang lima ka adlaw nga state visit sa India, nga gitiman-an sa ika-75 anibersaryo sa diplomatic relations sa duha ka nasud. Sa iyang pagbisita, gipahigayon niya ang miting uban nila Prime Minister Narendra Modi ug President Droupadi Murmu, diin ilang giinaugurar ang Strategic Partnership tali sa Pilipinas ug India. Ang maong alyansa naglangkob sa depensa, maritime security, siyensiya ug teknolohiya, kultura, ug turismo. Gipasidunggan si Marcos sa full ceremonial honors sa Rashtrapati Bhavan, ug mihatag sa iyang foreign policy address sa Observer Research Foundation.
Nakapirma ang duha ka nasud sa 13 ka bilateral agreements nga naglangkob sa judicial cooperation, space technology, defense, ug cultural exchange. Gitataw ni Marcos ang pagpasalamat sa India sa pagsuporta sa international law, lakip na ang 2016 arbitral ruling batok sa China sa South China Sea. Gisuportahan sa India ang rules-based order sa Indo-Pacific, nga importante sa regional stability ug food security. Gihisgutan usab ang posibilidad sa Preferential Trade Agreement aron mapalapad ang economic cooperation.
Kauban sa Presidente ang business delegation nga nakapirma sa 18 ka business agreements nga nagkantidad sa $446 milyon, ug potential investments nga moabot og $5.8 bilyon. Ang mga sektor nga naapil mao ang renewable energy, imprastruktura, IT-BPM, healthcare, ug digital services. Gilauman nga kini maghimo og kapin sa 4,000 ka direct jobs ug maghatag og digital upskilling training sa kapin 26,000 ka Pilipino sa AI ug cybersecurity. Ang mga benepisyo sa katawhan naglakip sa mas barato nga medisina, lig-on nga konektividad, ug mas lig-on nga food supply.
