Wala pa gihapon makab-ot nga pinal nga desisyon ang Cagayan de Oro City Police Office (COCPO) kung ipatuman ba ang signal jamming sa Civic and Military Parade sa Higalaay Festival karong tuiga.
Sa press briefing nga gipahigayon, gipadayag ni Police Lt. Col. Jelesis Teves nga andam na ang kapulisan sa paghatag sa hugot nga seguridad sa maong kalihokan, apan gitan-aw pa sa ilang intelligence division ang posibilidad sa pagputol sa signal sa komunikasyon ug internet sa mga dalan nga agian sa parada.
Matod pa ni Teves, mas pabor ang signal jamming ilabi na sa dagkong selebrasyon aron malikayan ang hulga sa terorismo ug uban pang matang sa pagpanabotahe, apan kinahanglan pa kini timbang-timbangon ug aprobahan sa mga kauban nga ahensya sa seguridad.
