CAGAYAN DE ORO CITY – Nainsulto ang libuang mga trabahante sa Agrinanas Devt Corporation sa kalit nga pagkawagtang sa ilang mga trabaho sa Bukidnon.
Kini human mideklara ang kompanya sa pagka-bangkaruta rason nga daghan ang nawad-an sa panginabuhian.
Miingon si Agrinanas Union Pres. Anthony Hingking nga wala sila gipahibalo sa tigpamaba sa kompanya ug igo lang sila giingnan nga manirado kay nakasinati sa pagkalugi sa operasyon.
Dugtong niini,giaghat ni Labor lawyer Proculo Sarmen ang mga empleyado nga mosang-at sa kaso.
Kini aron masuta kung tinud-anay nga nalugi ang kompanya o paagi lamang aron mailisdan sila sa bag-ong mga trabahante nga moatiman sa lapad nga plantasyon sa sagingan sa lungsod sa Libona ug Talakag,Bukidnon.
Hisayrang ang mga saging nga abot sa maong kompanya ang kabahin sa export products gikan sa Pilipinas padulong ngadto sa nagkadaiyang bahin sa kalibutan.
