Giduso sa Sangguniang Panlungsod sa Iligan City ang ordinansa nga naglatid sa pagmuntar sa Indigenous Peoples (IP) Help Desk sa matag departamento sa ilang syudad.
Ang sugyot, nga gipangulohan ni Iligan City Councilor Sultan Renandang M. Comonog, ang Indigenous People Mandatory Representative (IPMR), ug giaprobahan na sa unang pagbasa.
Gipunting sa ordinansa ang paghatag sa mas episyente, inklusibo, ug accessible nga serbisyo alang sa mga lumad nga komunidad sa Iligan.
Gidetalye niini ang istruktura, mga gimbuhaton, alokasyon sa pondo, ug mga mekanismo sa koordinasyon aron masiguro nga ang matag departamento sa City Hall adunay kapasidad sa pag-atiman sa mga panginahanglan sa IP sector.
Pinaagi sa inisyatibo, gilauman nga mapalig-on ang pakig-uban sa mga lumad, mapadali ang ilang transaksyon sa gobyerno, ug mapalambo ang ilang partisipasyon sa mga programa sa syudad.
Usa kini ka lakang padulong sa mas patas ug makiangayon nga serbisyo publiko, diin walay sektor ang mapasagdan.
