CAGAYAN DE ORO CITY – Nagpatuman sa sunod-sunod nga pagsuspenso sa klase sa tanan lebel ang usa ka component city ug 14 ka lungsod nga sakop sa Misamis Oriental sulod sa duha ka adlaw.
Kini subay sa mga gipasar nga mga executive orders sa nagkadaiyang munisipyo epekto sa lalawigan sugod ning adlawa hangtod ugma.
Pinakauna nga mipatuman sa class suspension si Gingoog City Mayor Eric Cañosa agi’g paghatag proteksyon sa mga magtutungha ingon man sa mga magtutudlo batok sa idulot nga dili maayong epekto sa bagyong Tino.
Dumduman nga nahimutang sa coastal area ang 24 ka lugar sa Misamis Oriental ug gawas lang sa lungsod sa Claveria.
Tipik sa mga nagpatuman sa suspension sa klase sa tanang lebel ang Tagoloan, Balingoan, Balingasag, Sugbongcogon, Binuangan, Medina, Opol, Kinoguitan, Magsaysay, Lagonglong, Manticao,Naawan,Initao ug Talisayan.
Samtang wala pa’y abiso nga gipagawas ang Cagayan de Oro ug ubang kalungsuran sa Misamis Oriental kabahin sa class suspension.Sa pinakaulahing weather forecast kang Tino, kini naglihok ibabaw sa Philippine Sea.
Nahimutang ang sentro sa bagyo sa 430 kilometros sa silangan sa Guiuan,Eastern Samar.Kini naghupot sa 110 kilometros kada-oras nga hangin duol sa sentro ug paghuros nga 135 kilometros kada-oras.
Naglihok kini sa kaspaspason nga 30 kilometros kada-takna nga kasadpan-habagatan-kasadpang direksyon.
Hisayrang ubos sa signal no. 1 ang Gingoog City,Magsaysay,Talisayan,Balingoan,Medina,Kinoguitan,Claveria,Tagoloan,Villanueva, Jasaan,Balingasag,Lagonglong,Salay,Binuangan,Sugbongcogon sa Misamis Oriental ug Camiguin province.
