Gibarugan sa pinangita sa balaod nga si kanhi Ako Bicol partylist Rep. Zaldy Co ang iyang gibulgar kabahin sa pasangil nga nalambigit sa grabeng kurapsyon ang mag-agaw nga si Pres Bongbong Marcos ug kanhi House Speaker Martin Romualdez sukad sila nangulo pagdumala sa renda sa pangagamhanan sa nasud.
Kini human gihataga’g katin-awan ni Zaldy pinaagi sa iyang pinakaulahing gipakatag nga video message sa Facebook bag-uhay lang.
Gihataga’g katin-awan ni Co nga dili tinood nga napadulong kaniya ang 26 bilyon pesos nga kickbacks kay igo lang kini miagi kaniya apan napaingon sa mag-agaw nga si Marcos ug Romualdez.
Gipamugos ni Co nga maoy tinood nga anaa sa 56 bilyones pesos ang katibuk-ang salapi ang natigom sukad 2022 hangtod 2025 nga sila si Bongbong ug Martin lang daw ang nagbahin-bahin.
Wala pa daw apil niini ang mando ni Marcos nga 100 billion pesos nga budget insertion sa 2025 general appropriations act ug laing 97 billion pesos nga flood control insert sa 2026 National Expenditure Program.
Gisaysay niini nga sa pagkahimo niya nga chairman sa appropriations committee sa kamarabaha sugod tuig 2022,giingong gimanduan siya ni Romuadez nga maghatagan kang Marcos sa tag-dos milyones pesos kada-bulan.
Sulod ning tuiga usab sumala ni Co nga nanawag kaniya si retired DPWH Undersecretary for regional operations Engr Roberto Bernardo Jr kabahin sa ilang suliran sa pagbaha sa Bulacan Province.
Natahasan ni Bernardo si kanhi DPWH Bulacan 1st District Engr Henry Alcantara nga makigkita kaniya sulod sa iyang opisina sa kamarabaha.
Mismo daw si Alcantara ang miyagyag sa iyang atubangan sa sistema sa binahina diin 22 porsiento alang kang Romualdez, dos porsiento kang Bernardo ug un-porsiento alang kaniya.
Gisaysay ni Co nga ang isigka- mga bastos nila ni Alcantara ang nagka-kontakay kabahin sa kickbacks.
Dugang niini nga sa milaba’yng 2024 budget deliberation, kalit nakig-meeting ang usa ka Undersecretary Jojo Cadiz kanila diin nagsaysay nga sobra kasuko si PBBM kay giingong walay nadawatan nga remittances.
Kini ang hinungdang gimanduan siya ni Romualdez nga hatdan sa uno bilyon pesos si Marcos.
Kasuguan daw ni Marcos nga si Cadiz lang ang mokuha sa delivery aron kalikayan nga mohungaw.
Gipabusikad usab ni Zaldy nga gisugo ni Marcos si Romualdez nga paliton ang usa ka balay sa no.30 Tamarine Street, South Forbes Park kay himoong pondohanan sa koleksyon,kickbacks ug deliveries.
Giyagyag pa ni Co nga mismo kini ang mitunol sa unang 200 milyones pesos nga pondo kang Cadiz sinaskihan sa iyang mga trabahante sa maong balay aron mahatod sa balay ni PBBM sa no.41 Narra Street,South Forbes Park niadtong Disyembre 2,2024.
Nasigunduhan pa kini nga delivery ni Co kang Cadiz balor 800 milyones pesos alang gihapon daw kang Marcos niadtong Disyembre 5, 2025.
Nangugat si Zaldy nga kining tanan nga iyang binuhatan ang ubos sa mando ni Romualdez rason anaa sa 56 bilyon pesos nga salapi sa katawhan ang nawaldas sugod 2022 hangtod 2025.
Sa pagkutlong balita, wala pa’y bag-ong tubag o depensa ang Malakanyang kabahin sa video content ni Zaldy ug ang mga hulagway sa mga maleta nga nagbaton sa nagkadaiyang petsa diin giingong na-deliver ngadto sa iyang mga giila nga mga amo niadtong tungura.
Hisayrang ang subling pagtunga ni Co sa social media gitoohang epekto sa gilugwa nga arrest warrant sa Sandiganbayan kabahin sa lapad nga kurapsyon sa ghost flood control projects sa milabay’ng katuigan.
