Nagpasa na sa resolusyon si Committee on Public Order and Safety Chairman, Konsehal Roger Abaday aron mapitol ang ilegal nga drag racing ning syudad. Iyang gisugilon sa BOMBO RADYO nga unod sa resolusyon ang hugot nga koordinasyon tali sa Land Transportation Office (LTO) ug Cagayan de Oro City Police Office (COCPO) aron masanta ang dis-oras o kawat -awat nga lumba sa dagan sa mga motor ug race car sa piling-dalan sama sa Gusa National Highway, SM Uptown, Rotonda, Brgy. Tablon National Highway, Diverson Roads ug daghan pang lugar ning syudad. Gusto ni Abaday nga dakpon, kasuhan, ug kumpiskahon ang ilang mga sakyanan kay segurado nga nakalapas sa lagda sa trapiko, lakip na ang mga modified- improvised nga mga tambutso ug makina nga makahatag sa kasaba ug kasamok sa mga residente nga apektado sa ilang pagkatulog. Gawas niini, gilakip sa konsehal sa resolusyon ang pagdakop sa mga riding in tandem nga pratisado ang pagbiya sa crime scene ug dawsama sa drag racer kung makapadagan sa ilang sakyanan.
