Mupatuman sa Information, Education, and Communication (IEC) campaign ang City Health Office (CHO) kuyog ang Epidemiology and Surviellance Unit sa Department of Health Region -10 sa gi-report nga apektadong merkado sa kaso sa Leptospirosis. Kini ang gitin-aw ni Dra Claire Paglinawan, Officer in Charge sa CHO kalabot sa gipakatag nga “unverified report” nga adunay napulo ka fish vendors ang nakatay sa maong sakit. Gawas sa IEC Campaign sa mga kamerkaduhan, ila usab himoon ang kampanya sa mga barangay LGUs aron mahatagan sa pakisayud ang publiko kung unsa ka delikado ang kagaw gikan sa mga ilaga.
Una niini, gidepensa ni Konsehal Dr Paolo Gaane ang iyang special report sa konseho kalabot sa impormasyon nga iyang nadawatan. Gitin-aw niini nga “unverified” ang iyang nadawat nga report ug igo lang niya gipahibalo ang konseho sa iyang nadawat nga impormasyon, busa, iya kining gipa-ubos sa imbestigasyon kay siya man ang naghupot sa pagka chairman sa konseho sa committee on health.
