Gitug-an sa duha ka kanhi sundalo nga sakop sa Philippine Marines Corps nga mismo sila giingong nakahatod sa mga maleta nga puno sa salapi sa mismong balay ni Pres Bongbong Marcos sa Ilocos Norte ug bisan sa mansion niini sa Forbes Park sa kauluhan.
Kini ang tubag sa duha ka kanhi sundalo kung kinsa kanila ang adunay aktuwal nga pag-deliver sa mga maleta nga puno sa salapi nga unang gihulagway nga kickbacks gikan sa pipila kontaktor nga nakakuha sa flood control projects.
Sila miingon nga adunay higayon nga sa ilang pag-deliver kuyog nila si kanhi Ako Bicol partylist Rep. Zaldy Co ilabina sa hometown ni Marcos sa Ilocos Norte.
Namahayag usab ang ilang abogado nga si Levito Baligod nga sa mga gisulti sa maong mga kanhi sundalo,anaa silay gihuptan nga mga basehan ug mga ebedensiya.
Miingon si Baligod nga ilugwa nila sa ensaktong higayon ang mga nakuptan nila nga mga ebedensiya kabahin sa nasayran niining mga anomaliya sa gobierno.
Dugang sa abogado nga aduna pa’y 12 ka kanhi Philippine Marines nga gitakdang mogawas atubangan sa publiko aron ibulgar ang ila usab nga nasayran sa uban pang mga hinangal sa kagamhanan.
Sa pagkutlo ning balita, wala pa’y tubag nga gilugwa si Marcos o ang Malakanyang.
