CAGAYAN DE ORO CITY – Gipalig-on pa ang paghatag proteksyon alang sa Indigenous Peoples o IPs batok sa tanang porma sa mga abuso ug pagpanglupig sa ilang mga katungod nga binuhatan sa pipila ka pundok nga walay pagtahod sa kultura ingon man tradisyon nakabase sa Northern Mindanao.
Kini human misaad ang bag-ong naglangkob sa IP’s Regional Judiciary Council for Tribal Justice (IRJCTJ) Northern Mindanao atubangan sa Court of Appeals officiator alang sa mga lumad nga nasakop sa rehiyon.
Namahayag si Benedicto del Puerto nga naila usab nga si Datu Kawilihan Mansikampo kinsa bag-ong regional tribal chieftain sa konseho nga sila ang natahasan nga direktang mosulbad sa mga kaso nga naglambigit sa mga abuso diin biktima ang ilang mga ka-tribu.
Siya miingon nga apil sa mga kaso nga sulbaron ang mismong panagbangi sa isig ka lumad nga adunay panagbikil sa dugay nang panahon.
Dugang ni Del Puerto nga lakip usab sa gipakigbisugan sa tribu ang pipila ka panghitabo nga adunay mga lumad nga gipang-ilogan sa mga yuta sa dagkong korporasyon.
Gihinaut sa bag-ong langkob sa konseho nga unta mahatag nila ang gilauman sa ilang mga ka-tribu ug makatabang sa pagpalig-on sa hapsay sa katilingban sa mga lumad.
Hisayrang nagsugod sa pag-aktibo ang konseho sukad nalusad ang IP’s Regional Leadership Summit nga gihimo sa headquarters sa 4 Infantry Division,Philippine Army sa Camp Evangelista,Brgy Patag ning syudad tuig 2015.
