Bulahan daw ang mga mag-uuma tungod sa kasamtangang pagsaka sa presyo sa humay nga naghatag sa mas maayong kita sa ilang produksyon karong panahona. Sumala ni Department of Agriculture Region 10 Director Jose Apollo Pacamalan, ang presyo sa humay sa ubang kabukiran ug probinsya misaka na sa ₱20 hangtod ₱25 matag kilo, nga giisip nga positibong kahimtang alang sa sektor sa agrikultura. Apan giila usab niya nga bisan pa sa maayong kita sa mag-uuma, nagpabilin gihapon ang taas nga presyo sa bugas sa merkado nga moabot sa ₱48, ₱50 hangtod ₱60 matag kilo sa ubang lugar.Dugang pa niya, ang produksiyon sa Northern Mindanao nga mokabat og 14,500 ka sako nga i‑ani karong bulana molungtad pa sa 20–30 ka adlaw aron masupplayan ang adlaw‑adlaw nga panginahanglan sa rehiyon nga moabot og 30,000 ka sako kada adlaw. Busa, padayon ang pag‑awhag sa buhatan ngadto sa mga mag‑uuma nga dili moundang sa pagpananom ug kanunay nga magpakita og kasibot sa pag‑atiman sa ilang kaumahan aron mapahimuslan ang mahal nga presyo sa humay sa merkado. Giklaro usab ni Pacamalan nga base sa impormasyon gikan sa DTI, walay mag‑uuma nga nagpabadlong sa pagpasaka sa presyo sa humay; kini resulta sa pagtaas sa presyo sa lana. (by James Oliver)
