Gipahibalo ni President Ferdinand Marcos Jr. ang malampuson nga drilling ug testing sa Camago 3, usa ka bag-ong natuklasang gas well sa Malampaya nga naglaum nga makadugang sa suplay sa enerhiya sa nasod.
Sumala sa ulat, ang flaring operations nga gihimo sakay sa Noble Viking drill ship sa Prime Energy sa baybayon sa Palawan nagpakita sa kusog sa natural gas nga anaa ilawom sa dagat.
Gisulti nga ang Camago 3 adunay gibanabanang 2.5 ka pilo nga mas daghang recoverable gas kumpara sa Malampaya East 1 discovery.
Tungod niini, gilauman nga molugway pa sa mga unom ka tuig ang kinabuhi sa Malampaya gas field.Dugang pa sa pangulo, kini nga kalamboan nagpasabot og mas lig-on nga suplay sa kuryente, mas stable nga operasyon sa enerhiya, ug posibleng mas moubos nga gasto sa kuryente alang sa mga konsyumer.
Sa karon, nagpadayon ang monitoring ug technical evaluation sa proyekto aron masiguro ang hapsay nga pag-operate niini ug ang long-term nga benepisyo sa sektor sa enerhiya sa nasod.
Sa laing bahin, gitin-aw sa Presidential Communications Office nga ang Camago 3 makaproduce og mga 60 million standard cubic feet sa natural gas kada adlaw, nga makasuplay og kuryente para sa mokabat nga usa ka milyon nga kabalayan.
Gisulti usab nga mas baratohon ang natural gas gikan niini kumpara sa imported nga suplay.
Gikan sa Malampaya, ang presyo mokabat lamang sa 4 pesos ug 80 centavos kada kilowatt-hour, kon itandi sa mga 10 pesos ug 30 centavos gikan sa imported liquefied natural gas.
Dugang pa, ang maong kahimtang gitan-aw nga dakong tabang sa pagtipid sa budget sa mga pamilyang Pilipino ug makapadasig sa mas lig-on nga suplay sa kuryente sa nasod. (by Phillip Ariata)
