Gipahugtan pa sa Police Regional Office 10 (PRO-10) kauban ang Philippine Army ug Coast Guard ang pagbantay sa nagpadayong 30th Vice Mayors’ League of the Philippines (VMLP) National Convention sa Cagayan de Oro.
Namahayag si PRO-10 Spokesperson Police Major Joan Navarro nga gipakatap sa buhatan ang kapin 600 ka pulis—lakip ang mga gi-augment gikan sa Bukidnon, Misamis Oriental, ug Iligan City—aron maseguro ang kaluwasan sa kapin 700 ka delegado ug mga prominenteng opisyal sa nasud.
Segun ni Navarro nga bisan walay na-monitor nga seryosong hulga sa seguridad, kinahanglan gihapon ang hugot nga pag-alerto diha sa convention site, mga hotel, ug mga transportation hubs sama sa airport ug seaport.
Busa, gipasalig sa kapulisan nga magpabiling hapsay ang dagan sa maong dakong kalihokan hangtod sa pagtapos niini karong Biyernes.
